Тропарь

Пред святою Твоею иконою, Владычице, молящиеся исцелений сподобляются, веры истинныя познание приемлют и агарняская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети и к Сыну Твоему молитву вознеси о спасении душ наших.

Величание

Величаем Тя, Пресвятая Дево, и почитаем честную икону Твою, юже от лет древних на горе Почаевстей прославила еси.

Акафист Пресвятой Богородице в честь чудотворной иконы Ея Почаевской

Кондак 1

Взбранной воеводе родов христианских и страны нашей известней избавительнице хвалебныя песни принесем, вернии, на святой горе ея собравшеся; Ты же, яко имущая милосердие неизреченное, о Владычице Богородице, моления нашего пред чудотворным Твоим образом возносимаго не отвержи, да в умилении сердец зовем Ти: Радуйся, Похвало почаевская и всего мира Надеждо и Утешение.

Икос 1

Архангел Гавриил первее радуйся тебе приношаше, Владычице, егда зачатие Сына Божия благовествоваше, по преславнем же Успении Твоем вся Небесныя силы туюжде хвалу на Небеси Тебе непрестанно приносят; како убо мы грешнии своя гласы с гласы Безплотных совокупити дерзнем? Обаче милосердие Твое ко всем кающимся поминающе, устне наша со страхом и любовию отверзаем, глаголюще сице: Радуйся, милости бездно; радуйся любве неистощимое море. Радуйся, рода христианского Благая Предстатильнице; радуйся, обители Почаевская стено нерушимая. Радуйся, православные люди на гору Почаевскую узами любве привлекающая; радуйся всякую печаль от душ их отгоняющая. Радуйся, Еяже чудотворный образ, яко звезда от горы Почаевския нас путеводствует; радуйся, Ейже возносимыя молитвы страстные прилоги вскоре отражают. Радуйся, явлением Своим на горе сей люди утешившая; радуйся, след стопы Твоея на ней нам оставившая. Радуйся, верных присное дерзновение; радуйся, сумнящихся доброе утверждение. Радуйся, похвало почаевская и всего мира Надеждо и Утешение.

Кондак 2

Видивше пустынницы почаевстии и простец Иоанн Босый Пресвятую Богородицу на скале во огненном столпе явльшуюся, след стопы Ея на камени лобызаху и водою, зде истекшею, окропляяся, вопияху Богу: Аллилуиа.

Икос 2

Разум недоразумеваемый о явлении Твоем, Владычице, ищуще, в сицевом уповании утверждаемся, яко первее от агарян, послежде от еретиков оплот Православия на горе Почаевстей утвердити благоволила еси, сего ради в Твой святый храм приходяще, теплою верою сердца наша исполняем, глаголюще: Радуйся, истинныя веры утверждение; радуйся, зловерия явное обличение. Радуйся, древле в Неопалимей Купине Синайстей известившаяся; радуйся, христианом в столпе огненном зде явившаяся. Радуйся, яко в пещи горящей, росою спасении, Авраамстии отроцы тя предвозвестиша; радуйся, яко водою от следа стопы Твоея исцелении благодать Твою проповедаша. Радуйся, землю нашу  древле от агарян разореную, явлением Твоим тогда утешившая; радуйся, и ныне многими знаменьми молящиеся зде ободряющая. Радуйся, кающихся скорое услышание; радуйся, подвизающимся помощь и прибежище. Радуйся, и неведущих вразумление; радуйся и малодушных укрепление. Радуйся, Похвало Почаевская и всего мира Надеждо и Утешение.